بارك الله لكما وبارك عليكما وجمع بينكما في خير.
_مبارك يا آية
مبارك يا غيث.
_مبارك يا حبايبي..
كتب كتاب ومباركات وخطوبة وزغاريط وأحضان وليلة أنا معرفش دخلتها إزاي وفين ووقتيه بس أنا قلبي ضر.باته زايدة أوي الشيطان رجع يلعب بدماغي تاني ورجعت أسئلة النكد تيجي من جديد.
انسحبت من وسط التجمع دا ودخلت غسلت وشي بالماية ووقفت بصيت للمراية.. ملامحي متغيرة خالص أنا مش فرحانة ليه طيب ليه باهتة كدا طب غيث ذنبه إيه غيث دا أنا حتى لسة مسلمتش عليه!
هزيت راسي ونشفت وشي بالمناديل وأخدت نفس عميق وخرجت واتفاجئت بيه قصادي.
_أنت كويسة
_أيوا حسيت بس إني دايخة شوية ف قولت أغسل.
_طب تعالي أقعدي واضح إنك مش بتاكلي كويس.
قعدني على كرسي وسابني ودقيقة ولقيته باعت جميلة ب أكل
ابتسمت له ب امتنان على طيبته واهتمامه.
خلص اليوم ب احتفالاته وهيصته وقبل ما أمشي معاه أخدتني ماما للأوضة
_حافظي على جوزك واهتمي بيه.
_يعني إيه
_أنت فاهمة قصدي كويس يا آية إنسي حياتك ال فاتت كلها وركزي في حياتك الجديدة ال بتبدأ وال ربنا بيعوضك بيها.
وإحمدي ربنا إنه بعت لك واحد شاريكي وقابلك بكل ال حصل وبظروفك.
_مالها ظروفي
معلش!!
_مفيش حد في الزمن دا بيقبل إنه أول جوازته تبقى من واحدة مطلقة.
_والله أنت ال بتقولي كدا يا ماما!
طب عامة أعتقد إنه مش عيل علشان حد يغصبه على الجواز مني.. ثانيا المفروض إن لو الدنيا كلها هتعيب فيا ف تبقي أنت الوحيدة ال تدافعي عني وتقولي عكس ال يتقال يا ماما.
_أنا مقولتش حاجة لكل دا بعدين أنت عارفة إني مش بعرف أذوق الكلام.
سيبتها وخرجت ونزلت أنا وهو ومشينا وصلنا بيته.. دخلت معاه وأنا
متوترة لكن كل خوف وتوتر وقلق راح ومكانش له وجود بعد أول خطوة في البيت دا.
البيت دافي وهادي بشكل!
مش لاقية تشبيه له غير إن الخطوة فيه شبه الرجوع للوطن من بعد ما كنت مترحل منه ڠصب عنك وأخيرا رجعت له بعد اشتياق!
_نورتي بيتك.
_بيتي
_أيوا طبعا.
تعالي نغير ونقعد نتكلم شوية عيونك فيها أسئلة كتير وأنا كمان حابب أحكي لك حاجات أكتر.
_حاضر.
_قوليلي صحيح أطلب لك تاكلي إيه إحنا كلامنا هيطول وأكيد هنجوع.
_مش عارفة بس أطلب على ذوقك وأكيد هيعجبني.
سيبته ودخلت الأوضة وغيرت هدومي واتوضيت وصليت العشاء ودعيت ربنا كتير ييسر لي أموري ويهديني ويرضيني ب غيث ويراضيه بالجنة زي ما أنا شايفاه بيحاول يراضيني.
خلصت وخرجت بعد حوالي ساعة لقيته في البالكونة الكبيرة.. حاطط الأكل على التربيزة وجنبه عصير جوافة وقافل الستاير بحيث مظهرش لل برا دخلت وقعدت وأنا ببص على المنظر وببتسم على جمال المنظر وجمال قلب ال جهز المنظر.
_عجبك
_جدا.
_طب كلي يلا..
_حاضر بس أنت قولت هنتكلم في كلام كتير إيه هو الكلام دا
_قوليلي أنت الأول وإحنا نازلين دموعك كانت واضحة في عيونك ليه
وقبل ما تجاوبي..
تعالي نتفق نبدأ حياتنا على الصراحة.
_ماما كانت بتقول لي أحافظ عليك وأحمد ربنا إنك إتجوزتني وأنا مطلقة ودا يودينا للسؤال ال شاغلني من يوم ما اتقدمت لي.. اشمعنا دلوقتي يا غيث
جاوبني بالصراحة زي ما كنت لسة بتقول.
_حاضر هجاوبك بالصراحة بس في الأول عايز أقول لك إن كونك مطلقة دا ميعيبكبش ولا يثبت صحة كلام مامتك.
ثانيا بقا.. أنت عارفة إني مسافر طول حياتي من بعد ما خلصت الجامعة علطول إحنا يعتبر متربيين سوا كنت بعتبرك زي جميلة أختي وكنت فاكر إن مشاعري دي وحبي ليك كلها أخوة..
بس لما سافرت بقا وبعدنا إتأكدت إنك عمرك ما كنت ولا هتكوني أختي حسيت إني بحبك بجد.
سكت شوية وأخد نفس ورجع يكمل كلامه وأنا بسمع له باهتمام وصدمة واشتياق لمعرفة باقي كلامه
_قولت هاخد أجازة وأنزل أطلب إيدك من أخوك ونتخطب ونكتب الكتاب وأسافر تاني وبعد ما تخلصي جامعتك نتجوز وأخدك معايا ونزلت فعلا وحكيت لجميلة بس إتفاجئت لما قالت لي إن فيه واحد من الجامعة عندك سبقني وهتتخطبوا آخر الترم.
إتوجعت أوي وحسيت إني إتأخرت وخسړت شيء غالي أوي خليتها توعدني إنها متجيبش سيرة ال حكيته لها دا وسافرت تاني بس كان فيه صوت جوايا بيقول لي متزعلش لعله خير.
كنت بقول فين الخير في خسارة إنسانة بحبها!
بس سبحان الله بقا بعد صبر كمان سنتين وشوية أتجمع أنا وهي على كنبة واحدة وتبقى على اسمي وحلالي!
أنا محسيتش بدموعي ال بتنزل وأنا بسمع له معرفش بعيط ليه بس لوهلة اتمنيت لو إني كنت إتجوزت غيثهو الأول…
فوقت على إيده ال بتمسح دموعي ف إتكلمت
_طب هو كل دا حصل من الأول ليه يعني ليه أتجوز أدهم وأتوجع معاه علشان أبقا معاك
طب ليه أنت مأصريتش أول مرة وجيت برضه قولت ل آدم كإنك متعرفش أي
حاجة
مش كان زمان كل دا محصلش مش كان زمان الفترة ال فاتت دي ممكن تكون حنينة شوية عليا!
