ودخل هو.
وفي النهاية، طبق مكرونة بالبيض شكله مقبول اتحط قدام ليلى.
الأربعة وقفوا حواليها.
ليلى بصت للطبق.
وبعدين بصت لهم.
عمر قال
كلي.
مسكت الشوكة الصغيرة اللي آسر نزل مخصوص اشتراها لها.
أكلت لقمة.
الأربعة مركزين معاها.
سيف سأل
إيه رأيك؟
مضغت كويس.
بلعت.
وبجدية شديدة رفعت إبهامها.
تحفة.
عمر رفع حاجبه.
داق بنفسه.
بعد تلات ثواني…
حط الشوكة.
ملحها زيادة.
ليلى هزت راسها بسرعة.
لأ، حلوة.
مالحة جدًا.
أنا بحبها.
عمر بص لها.
مش محتاجة تجاملينا.
ليلى سكتت.
إيديها بطلت تتحرك.
عمر أخد الطبق.
عينيها جريت وراه فورًا.
عمو…
هعمل غيره.
بعد عشر دقايق رجع بطبق جديد.
المرة دي الملح مظبوط.
ليلى خلصته كله.
وشربت تقريبًا الشوربة كلها.
آسر كان مسند دقنه على إيده وبيبص لها.
مش كنتِ بتقولي بتاكلي قليل؟
إيد ليلى وقفت.
قالت بصوت واطي
خلاص… بكرة هاكل أقل.
آسر اتصدم.
لأ لأ! مش قصدي!
عدل كلامه بسرعة
قصدي كلي براحتك. البيت ده مش هيخرب عشان طفلة أكلت كويس.
بصت له.
بجد؟
بجد.
ينفع طبقين؟
…ينفع.
تلاتة؟
آسر جز على سنانه.
ينفع يا ليلى!
لأول مرة من ساعة ما وصلت…
ابتسمت.
آسر
سكت.
وبص الناحية التانية.
يعني… مش لطيفة أوي برضه.
ياسين بص له
محدش سألك.
بقول رأيي لنفسي.
بعد الفطار، فضل السؤال الأساسي
مين هيربي ليلى؟
ياسين فتح اللابتوب.
أول حاجة لازم نعترف بيها إن مفيش واحد فينا ظروفه تسمح إنه يربي طفلة لوحده.
عمر عنده عمليات وطوارئ.
ياسين عنده قضايا وسفر.
سيف ممكن مكالمة واحدة تخليه يختفي طول الليل.
وآسر جدوله أسوأ واحد فيهم.
النهارده هنا…
بكرة في بلد تانية.
آسر سأله
والحل؟
ياسين لف الشاشة ناحيتهم.
ندور على أسرة تتبناها.
سكتوا.
محدش اعترض فورًا.
لأن منطقيًا…
ده أفضل حل.
هما معاهم فلوس.
ويقدروا يلاقوا لها زوج وزوجة كويسين، عندهم وقت، وعايزين طفل فعلًا.
أحسن من أربع رجالة مايعرفوش حتى يربطوا شعر بنت.
سيف سأل
قدامنا قد إيه؟
شهر.
قال ياسين
خلال تلاتين يوم هدور بالطرق القانونية على أسرة مناسبة، وهنراجع دخلهم، وظروفهم، وسجلهم، وحالتهم الاجتماعية وكل حاجة.
عمر
موافق.
سيف
معنديش اعتراض.
بصوا لآسر.
عقد إيديه
اللي تشوفوه.
واتفقوا.
وياسين، باعتباره ياسين طبعًا…
كتب اتفاق رسمي!
خلال التلاتين يوم، الأربعة يتناوبوا على رعاية ليلى.
ولا يسمح لأي مشاعر شخصية إنها تعطل إجراءات إيجاد الأسرة المناسبة.
ومصلحة الطفلة تيجي قبل أي شيء.
الأربعة مضوا.
أما ليلى…
فماكانتش تعرف هما بيمضوا على إيه.
كانت قاعدة على السجادة بتلعب بأرنبها.
ياسين لم الورق وقال
يبقى اتفقنا.
وولا واحد فيهم كان يعرف إن بعد شهر…
نفس الأربع رجالة اللي مضوا النهارده من غير تردد، هيبقوا مستعدين يعملوا أي حاجة عشان يثبتوا إن الاتفاق ده باطل!
بعد الضهر ظهرت أول مشكلة.
ليلى لازم تنام.
والبيت مفيهوش أوضة أطفال.
الفيلا كبيرة وفيها أوض كتير…
بس ولا واحدة معمولة لطفلة عندها أربع سنين.
آسر اختار أوضة ضيوف.
هتنامي هنا.
ليلى هزت راسها بأدب.
غير لها الملاية وحط المخدة.
خلصنا.
طلعت على السر,,ـــــير.
آسر لف عشان يمشي.
إيد صغيرة شدت هدومه.
عمو آسر.
لف.
نعم؟
ممكن تسيب الباب مفتوح؟
ليه؟
نزلت عينيها.
مش بحب الضلمة.
بص للأوضة.
الستارة كانت مقفولة نص قفلة.
والأوضة أصلًا مش ضلمة.
كان هيتكلم، لكنه راح فتح الستارة.
الشمس دخلت الأوضة.
كده كويس؟
أيوه.
راح يمشي.
عمو آسر.
نعم تاني؟
الأرنب وقع.
رجع جابه.
فيه حاجة تانية؟
هزت راسها.
وصل للباب.
عمو آسر.
أخد نفس طويل.
ليلى!
سكتت فورًا.
لف لها.
كانت مستخبية تحت اللحاف ومبين منها عينيها بس.
عايزة إيه؟
…ولا حاجة.
أمال بتناديني ليه؟
عضت شفايفها.
وبعد فترة قالت
ماما كانت ساعات تمشي وأنا نايمة.
وسكتت لحظة.
وبعدين في مرة… ما رجعتش.
آسر اتجمد.
وفجأة فهم.
هي مش خايفة من الضلمة.
هي خايفة تنام…
وتصحى تلاقي اللي حواليها اختفوا.
بص للكرسي جنب السر,,ـــــير.
سحبه وقعد.
نامي.
رمشت.
مش هتمشي؟
لما تنامي أبقى أشوف.
بس إنت مشغول.
مين قال؟
إنتوا قولتوا الصبح.
اتزنق.
طلع موبايله.
أنا قاعد ألعب في الموبايل. الموضوع مالوش علاقة بيكي.
ابتسمت.
حاضر.
بعد خمس دقايق نامت.
بعد عشر دقايق…
آسر لسه قاعد.
بعد عشرين دقيقة، عمر عدى قدام الأوضة وشاف أخوه قاعد جنب سر,,ـــــير الطفلة.
بصوا لبعض.
آسر قال بسرعة وبصوت واطي
أنا بس خايف تصحى تعيط وتصدعنا.
عمر ما ردش.
بص له ثانيتين.
وقفل الباب بهدوء أكتر وهو ماشي.
بالليل، انعقد الاجتماع العائلي التاني.
الموضوع
مين هيقعد مع ليلى بكرة؟
عمر
الساعة سبعة لازم أكون في المستشفى.
ياسين
عندي عميل الساعة تمانية.
سيف
لازم أكون في القسم ستة ونص.
التلاتة بصوا لآسر.
فتح عينه
أنا عندي تصوير الساعة خمسة!
سكتوا.
وفجأة جه صوت صغير من وراهم.
أنا ممكن أقعد لوحدي.
لفوا كلهم.
ليلى كانت واقفة على السلم وحاضنة الأرنب.
ماما كانت بتروح الشغل وتسيبني لوحدي.
سيف عقد حواجبه.
لمدة قد إيه؟
ساعات لحد بالليل.
بتاكلي إيه؟
عيش.
ولو حصلت مشكلة؟
ما بفتحش الباب.
ولو حد غريب
كلمك؟
ما بكلموش.
ولو البيت ولع؟
ليلى اتسمرت.
